Ambasada e Francës në Shqipëri njofton Universitetin e Tiranës se është hapur thirrja për aplikime për bursat e Qeverisë Franceze “France Excellence”, për kandidatët shqiptarë që dëshirojnë të vijojnë studimet në Francë në fillim të vitit akademik, në shtator 2026.

Bursat janë të vlefshme për nivelin master dhe doktoraturë (tezë në bashkëdrejtim ose bashkëudhëheqje). Prioritet do të kenë aplikimet për Master Viti II ndaj Master Viti I.

Fushat prioritare

Fushat e synuara janë STEM (shkencë, teknologji, inxhinieri dhe matematikë), në veçanti teknologjitë e informacionit dhe komunikimit, nga elektronika deri te inteligjenca artificiale, si dhe shkencat mjedisore. Sektorët prioritarë përfshijnë shërbimet digjitale, mjedisin (ujë, mbetje), energjitë e rinovueshme, transportin dhe mobilitetin me karbon të ulët, zhvillimin urban dhe turizmin.

Mund të shqyrtohen gjithashtu aplikime në fushat e shkencave humane dhe sociale, nëse ato lidhen me tranzicionin digjital dhe mjedisor. Aplikimi duhet të përcaktojë qartë fushën dhe/ose sektorin me të cilin lidhet programi i studimit.

Çfarë përfshin bursa

Bursa për master përfshin:

• pagesë mujore prej 900 eurosh, për një periudhë jo më shumë se 10 muaj;
• përjashtim nga tarifat e regjistrimit në institucionet publike nën autoritetin e ministrisë përgjegjëse për arsimin e lartë;
• mbulim pa pagesë të tarifave të lidhura me vizën;
• mbulim të sigurimeve shoqërore;
• ndihmë për gjetjen e akomodimit.

Bursa për doktoraturë përfshin:

• pagesë mujore prej 1 850 eurosh;
• qëndrime 6-mujore për çdo vit akademik, për 3 vite radhazi; qëndrimet në Francë duhet të përputhen me datat e përcaktuara në kalendarin që do të paraqitet;
• mbulim të sigurimeve shoqërore;
• mbulim pa pagesë të tarifave të lidhura me vizën;
• ndihmë për gjetjen e akomodimit.

Shënim: As bursa për master dhe as ajo për doktoraturë nuk mbulojnë blerjen e biletave të avionit. Kandidatët duhet të verifikojnë pranë institucioneve franceze nëse, përveç tarifave të regjistrimit, aplikohen tarifa shtesë të formimit; këto tarifa nuk mbulohen nga bursa dhe mbeten përgjegjësi e bursistit.

Kushtet dhe kriteret e aplikimit

• Të ketë shtetësi shqiptare;
• Të jetë nën 30 vjeç për nivelin master dhe nën 35 vjeç për nivelin doktoraturë;
• Të ketë nivel gjuhësor në përputhje me kërkesat e universitetit francez për programin e zgjedhur. Niveli minimal i kërkuar nga universitetet franceze është B2, i certifikuar me diplomë ose test;
• Prioritet do t’u jepet programeve shkencore në gjuhën frënge. Në raste të veçanta mund të shqyrtohen edhe aplikime për programe në gjuhën angleze, kur kandidati dëshmon ekselencë akademike dhe qartësi të projektit të studimit dhe atij profesional.

Kujdes: Bursa nuk mund t’u akordohet kandidatëve shqiptarë që janë tashmë duke studiuar në Francë.

Dokumentacioni i aplikimit

• Formulari i aplikimit;
• Kopje e pasaportës;
• Kopje e diplomës më të lartë dhe listës së notave (kërkohet përkthim i certifikuar në frëngjisht);
• Certifikatë e njohjes së gjuhës frënge (B2) ose gjuhës angleze, sipas programit master/doktoraturë të parashikuar;
• CV në frëngjisht (për programet në anglisht, CV-ja duhet të jetë në anglisht);
• Letër motivimi në frëngjisht që paraqet projektin e studimit në Francë (për programet në anglisht, letra duhet të jetë në anglisht);
• Marrëveshje për bashkëdrejtimin/bashkëudhëheqjen e tezës dhe kalendarin e qëndrimeve në Francë, për kandidatët e doktoraturës;
• Letër/letër rekomandimi nga drejtori dhe/ose një pedagog i institucionit të origjinës;
• Vërtetim paraprak regjistrimi në master ose kopje e listës së masterave të zgjedhur në platformën “My Master”. Bursat do t’u akordohen vetëm kandidatëve që dëshmojnë regjistrimin në një universitet francez.

Afati dhe mënyra e aplikimit

Afati i fundit për dorëzimin e aplikimeve është data 29 maj 2026.

Dokumentet duhet të dorëzohen ose të dërgohen me postë brenda afatit pranë Ambasadës së Francës në Shqipëri, në adresën: Rruga “Skënderbej”, nr. 14, Tiranë.

Një kopje e skanuar e dosjes, me të gjitha dokumentet në një skedar të vetëm PDF me madhësi jo më të madhe se 7 MB, duhet të dërgohet edhe me e-mail në adresën: scac.tirana-amba@diplomatie.gouv.fr

Asnjë dokument/dosje nuk do të pranohet pas këtij afati, me përjashtim të vërtetimit të pranimit në master. Aplikimet e paplota ose të papranueshme do të refuzohen.

Procesi i përzgjedhjes

Dosjet do të shqyrtohen nga Shërbimi i Bashkëpunimit dhe Veprimtarisë Kulturore i Ambasadës së Francës në Shqipëri. Kandidatët e parazgjedhur në bazë të dosjes do të ftohen për intervistë përzgjedhëse. Vendimi i jurisë është përfundimtar.

Gjatë muajit korrik 2026 do të bëhet komunikimi i vendimeve përfundimtare për kandidatët. Do të hartohet edhe një listë plotësuese për të zëvendësuar kandidatët e përzgjedhur që mund të tërhiqen.

Contact

Për çdo pyetje lidhur me procesin e aplikimit, kandidatët mund të kontaktojnë në adresën: scac.tirana-amba@diplomatie.gouv.fr.

Më shumë informacion gjendet në linkun: https://www.kubfrancetirana.com/fr/accueil/