"​Në ambientet e Fakultetit të Historisë dhe të Filologjisë u zhvillua një takim me Ambasadorin e Republikës së Turqisë, Shkëlqesinë e Tij, z. Tayyar Kağan Atay, ku morën pjesë Dekani i Fakultetit, Prof. Dr. Mark Marku, Drejtori i Institutit "Yunus Emre" në Tiranë, z. Oğuzhan Sakoğlu, pedagogë dhe studentë të fakultetit. Gjatë fjalës së tij, Ambasadori u ndal tek lidhjet historike dhe marrëdhëniet diplomatike mes dy vendeve, duke prekur bashkëpunimin në fushat e ekonomisë, transportit dhe kulturës. Ai iu dha rëndësi të veçantë mundësive për bursa studimi në Turqi, si dhe projekteve të përbashkëta në fushën e kërkimeve shkencore.
​Nga ana e tij, Dekani i Fakultetit, Prof. Dr. Mark Marku, vlerësoi marrëdhëniet e mira që institucioni mban me Ambasadën dhe Institutin e Gjuhës dhe Kulturës Turke "Yunus Emre" në Tiranë, duke vënë theksin tek organizimi i aktiviteteve të përbashkëta. Ai nënvizoi se këto iniciativa ngrenë ura bashkëpunimi frytdhënëse dhe hapin shtigje të reja për studime të mëtejshme, ndaj dhe vazhdimësia e këtij partneriteti mbetet thelbësore. Takimi vijoi me një bisedë të ngrohtë, ku studentët dhe pedagogët patën mundësi të bënin pyetje dhe të diskutonin lirisht me Ambasadorin Atay."